வடக்கு அகதிகளின் வரலாற்றுச் சுமையை புத்தளம் தாங்கி நிற்கிறது
2:49 AM // 0 comments // Balapiti Aroos // Category: news , WORLD NEWS //(கற்றுக் கொண்ட பாடங்கள் மற்றும் நல்லிணக்க ஆணைக்குழு (LLRC)முன்னிலையில் அளிக்கப்பட்ட சாட்சியம்)
அஷ்ஷெய்க் எம்.ஏ.எல்.எம். பஸ்லுல் பாரிஸ் (நளீமி)
இந்த நாட்டின் நீண்ட நெடிய வரலாற்றுப் பக்கங்களில் பாரம்பரிய இலங்கையின் எழுச்சி, உயர்ச்சி, பாதுகாப்பு என்பவற்றுக்கு ஆயிரக்கணக்கான ஆலோசனைகளையும் பல்லாயிரக்கணக்கான உயிர்களையும் வழங்கி எமது மூதாதையர்கள் பெரும் பங்களிப்பை இந்நாட்டுக்கு வழங்கியிருக்கிறார்கள். இந்த நாட்டிற்கு எதிராக எந்தவொரு சந்தர்ப்பத்திலும் எனது சமூகம் சதித்திட்டம் தீட்டவோ, சதி முயற்சிகளில் ஈடுபடவோ இல்லை என்பதே வரலாற்றை இதய சுத்தியோடு பார்த்த பேராசிரியர் லோனா தேவராஜா போன்றவர்களது உறுதியான நிலைப்பாடாகும்.இனி ஒருபோதும் இந்த கௌரவமான எமது தாய் நாட்டின் மேனி குருதிச் சொட்டுக்களால் நனையக் கூடாது என்பதே இந்த சின்னவனின் கனவும் அவாவும் திடமான தீர்மானமுமாகும்.
இந்த நாட்டில் கடந்த 30 வருடங்களாக நடைபெற்ற யுத்தத்தின் விளைவாக இலங்கை மக்கள் நேரடியாகவும் மறைமுகமாகவும் பாதிக்கப்பட்டனர். அதன் தாக்கத்தினையும் பாதிப்பினையும் இந்த நிமிடம் வரை அவர்கள் அனுபவித்து வருகிறார்கள். உண்மையில் மறைமுகமாக பாதிக்கப்பட்டவர்களுள் புத்தளம் தொகுதியில் வாழும் எமது மக்கள் முதன்மையிலும் முதன்மையானவர்கள்.
எமது புத்தளம் தொகுதி முஸ்லிம்களுக்கும் புத்தளம் தொகுதிக்குள்ளே அகதிகளாகிப்போன சோக அனுபவங்கள் உண்டு. சிறிய முஸ்லிம் பள்ளியை மையமாகக் கொண்டிருந்த பொத்துவில் என்ற முஸ்லிம் கிராமம் இன்று முழுமையான சிங்களக் கிராமமாக மாறியுள்ளது. இதனை இந்த நாட்டை ஆட்சி செய்த எந்த அரசும் கண்டு கொள்ளவில்லை. இந்த அனுபவம்தான் வடமாகாண முஸ்லிம்கள் இடம்பெயர்க்கப்பட்டு எமது மண்ணுக்கு வருகை தந்த 20 வருடங்களாகியும் எமக்குரிய அனைத்து வளங்களையும் அவர்களோடு பகிர்ந்து வாழ்ந்து வருகிறோம்.
வட மாகாண முஸ்லிம் சமூகம் திட்டமிடப்பட்டு இனச்சுத்திகரிப்புக்கு உட்படுத்தப்பட்டது. மறுபுறத்தில் அதன் விளைவாக எமது மக்கள் இந்த மண்ணில் கல்வி, கலாசாரம், பண்பாடு, பொருளாதாரம், சுகாதாரம், தொழில் வாய்ப்பு என்பவற்றின் மீது நாசத்தை உண்டுபண்ணும் மறைமுகமான அழிப்புக் கொள்கையயான்று திணிக்கப்பட்ட நிலையில் இரண்டு தசாப்தங்களுக்கு மேலாக இவற்றை அனுபவித்து வருகின்றனர். இரு பிரதேசங்களில் (வட, வடமேல் மாகாணம்) வாழ்ந்த ஒரே சமூகம் பாதிக்கப்பட்டிப்பதுதான் இங்கு கவலைக்குரியதாகும்.
முறையான திட்டமிடல் இன்மையால் திட்டமிட்ட இனச்சுத்திகரிப்புக்கு உட்பட்ட வட மாகாண முஸ்லிம் சமூகம் இத் தொகுதியில் இரண்டு தசாப்தங்களுக்கு மேலாக வாழவேண்டிய துன்பியல்நிலை ஏற்பட்ட விளைவாக புத்தளம் சமூகத்தின் கல்விநிலை பெரிதும் பாதிக்கப்பட்டது. வட மாகாண மக்கள் அகதிகளாக எமது தொகுதிக்கு வருகின்றபோது எமது கல்விக் கூடங்கள் அகதி முகாம்களாக மாறின.
வட மாகாண முஸ்லிம்கள் இடம் பெயர்ந்து வந்தபோது பல மாதங்களாக எமது கல்வி வாழ்க்கை முற்றுகையிடப்பட்டது. அன்று பாடசாலை மூடப்பட்டமை மாணவ உள்ளங்களுக்கு மகிழ்வைத் தந்தபோதும், அன்றைய எமது சமூகத்தின் க.பொ.த சாதாரணதர, உயர்தர பெறுபேறுகள் கடுமையாகவே பாதிக்கப்பட்டன. எமது வாழ்வில் அது பெரும் பாதிப்பை ஏற்படுத்தியுள்ளது என்பது கசப்பான உண்மையாகும். எமக்கு ஏற்பட்ட இந்தக் கொடுமையை இப்பிரதேசத்தில் வாழும் தமிழ், சிங்கள சமூகங்களது பிள்ளைகள் அனுபவிக்கவில்லை. அவர்கள் சீருடையோடு பாடசாலைக்கு சென்று கொண்டிருந்தார்கள். நாங்களோ தெருக்களிலும் விளையாட்டு மைதானங்களிலும் பற்றைக் காடுகளிலும் காலத்தை வீணடித்துக் கொண்டிருந்தோம். அதன் பாதிப்புகள் இன்றுவரையிலும் தொடர்கின்றன. பல்கலைக்கழக அனுமதி வாய்ப்பை இழந்தவர்களும் உயர்தரத்தில் கற்பதற்கான வாய்ப்பை இழந்த பலரும் இந்தப் போராட்டக் காலத்தில் வசந்தம் நிறைந்த பருவத்தை தொலைத்த சோகத்தை யாரிடம் சொல்லி அழுவது?
எப்போது எமது பாடசாலைகள் வட மாகாண முஸ்லிம்களுக்கான வாழிடமாக மாறியதோ அன்றிலிருந்து திட்டமிட்டு இனச் சுத்திகரிப்பு செய்யப்பட்ட வட மாகாண முஸ்லிம் சமூகமும் நாமும் கல்வியில் இடர்பாடுகளை, நெருக்கடிகளை சந்தித்திருப்பதை சொல்லியாக வேண்டும். எமது பாடசாலைகளுக்கான பௌதிக வள ஏற்பாடுகளை நினைத்தாலே நெஞ்சு கனத்து விடுகிறது.
வடமேல் மாகாணம் ஒதுக்கீடு செய்கின்ற இந்த மாகாணத்திற்குரியவர்களுடைய வளங்களையே மனிதாபிமான, சகோதரத்துவ அடிப்படையில் எமது மக்கள் பகிர்ந்து கொண்டார்கள். பாடசாலைக் கட்டிடம் உட்பட அனைத்து உட்கட்டமைப்பு வசதிகளையும் வட மாகாண முஸ்லிம்களோடு பகிர்ந்து கொள்ள வேண்டிய கடமை எமக்கு ஏற்பட்டது. இந்நிலை பாடசாலைகளின் இயக்கத்திலும் இலக்கிலும் பெரும் பாதிப்பை ஏற்படுத்தி இருக்கிறது. இப்படி நாம் அனுபவிக்கின்ற துன்பத்தை இந்த நாட்டில் யாருமே ஆய்வறிந்து உணர மாட்டார்களா?
எனது மாணவ சமூகத்தின் உயர்கல்வி வாய்ப்பினை 30 வருட கொடூர இன முரண்பாட்டு யுத்தம் கடுமையாகப் பாதித்துள்ளது. பல்கலைக்கழக அனுமதியிலும் எமது சமூகம் தனது ஒதுக்கீடுகளைப் பகிர்ந்து கொண்டதன் விளைவு எமது சமூகத்தை வழிநடத்தத்தகு எதிர்கால தலைவர்களை, நல்லிணக்கத்திற்கு ஏணிப் படிகளாய் அமையக்கூடிய புத்திஜீவிகளை உருவாக்கிக் கொள்வதிலும் பாரிய தோல்வியை சந்தித்துள்ளது.
அதுமட்டுமன்றி, தொடர்ச்சியாக எமது மக்கள் கல்வி மீதான நம்பிக்கையை இழந்து வருகிறார்கள். இதற்கு பிரதான காரணிகளுள் ஒன்றாக அமைவது, பெறுபேற்று அடிப்படையில் தம்மைவிட குறைந்த பெறுபேறுகளைக் கொண்ட இடம்பெயர்க்கப்பட்ட வட மாகாண மக்கள் சிறந்த தொழில் வாய்ப்பினை பெற்றுக்கொள்கிறார்கள். இடம்பெயர்க்கப்பட்ட வடமாகாண மக்கள் வடமேல் மாகாண மக்களினால் நிரப்பப்பட வேண்டிய வேலைவாய்ப்புகளிலும் பங்கு கொள்கின்றனர். அத்தோடு வடமாகாணத்தினால் வழங்கப்படும் வேலைவாய்ப்புகளிலும் முழுமையாக பங்குகொள்கிறார்கள். மட்டுமல்லாது, வட மாகாணத்தில் தொழில் வாய்ப்பினைப் பெற்று சிறிது கால இடை வெளிக்குள் வட மேல் மாகாண நிருவாக எல்லைக்குள் இடமாற்றத்தைப் பெற்று சேவையைத் தொடர்கின்றனர்.
இதன் விளைவாக, எமது மக்களுக்கு உரித்தான வெற்றிடங்கள் அம்மக்களால் நிரப்பப்படுகின்றன. அதேவேளை வட மாகாணத்தில் மீண்டும் வெற்றிடங்கள் உருவாகி, அவ் வெற்றிடத்திற்கான புதிய நியமனங்களை வட மாகாண மக்களே பெற்றுக் கொள்கின்றனர். இச்சுற்றோட்டமே கடந்த 2 தசாப்தங்களாக இடம் பெற்று வருகின்றமையினால் புத்தளம் மாவட்ட மக்கள் தொழில் வாய்ப்புக்களை தொடர்ச்சியாக இழந்து வருகின்றனர். விளைவாக, கல்வியின் மீதான எமது மக்களின் நம்பிக்கையீனமும் ஆர்வமின்மையும் அதிகரித்து வருகிறது. இதனை அரச, தனியார் நிறுவனங்களை ஆய்வு செய்கின்றபோது புரிந்து கொள்ளலாம்.
எமது மக்களின் கல்விப் பாதிப்புக்கு மற்றுமொரு காரணி, இம்மாவட்ட ண புள்ளி முன்னேறிய மாவட்டங்களுக்கு நிகராக கணிப்பிடப்படுகின்றமையாகும். காரணம் இம்மாவட்டத்தின் கல்வித் தரமும் ஆசிரியர் வளமும் பௌதிக முன்னேற்றமும் சிங்கள மொழிமூல பாடசாலைகளில் மிக உயர்வாக காணப்படுகின்றமையாகும். அந்தத் தரத்தில் வைத்து எமது மாணவர்களின் அளவீடும் நிர்ணயிக்கப்படுகிறது.
சிலாபம், வென்னப்புவ தொகுதிகளுக்குள் சகல வசதிகளும் கொண்ட மிகச் சிறந்த சிங்கள மொழிமூல பாடசாலைகள் உள்ளன. அத்தோடு நீர்கொழும்பு, கொழும்பு போன்ற நகரங்களில் கிடைக்கப்பெறும் கல்வி வாய்ப்புகளை பெற்றுக் கொள்வதற்கான சந்தர்ப்பங்கள் அதிகமாகவே உள்ளன. எமது மக்களின் பிரதான பிரச்சினை சிங்கள மொழிமூல பாடசாலைகளின் தரத்திற்கு எமது பாடசாலைகளின் பௌதிக, மனித வளம் உயர்த்தப்படாமல் இருப்பதேயாகும். இவ்விடைவெளி நிரப்பப்படாதபோது எமது சமூகத்தின் நிலையை அறிவார்ந்து வழிநடத்தும் சிந்தனையாளர்களும் சமூகங்களுக்கிடையில் நல்லிணக்கத்தை ஏற்படுத்துவதற்கு பாலமாக அமைகின்றவர்களும் உருவாகின்ற நிலை சந்தேகத்திற்குரியதே. இது இனங்களுக்கிடையில் சந்தேகப் பார்வையையும் குரோத மனப்பான்மையையும் வலுப்படுத்தவே செய்யும்.
உதாரணமாக, எமது ஜனாதிபதியின் கடந்த பதவிக்காலத்தின் போது மஹிந்த சிந்தனைக்கிணங்க செயற்படுத்தப்பட்ட இசுறு பாடசாலைத் திட்டம் புத்தளம் மாவட்டத்தில் அமைந்துள்ள எந்தவொரு தமிழ்மொழி மூல பாடசாலைக்கும் வழங்கப்படவில்லை. மட்டுமன்றி இசுறு பாடசாலை செயற்திட்டத்திற்குள் கனமூலை மு.ம.வி. உள்வாங்கப்பட்டுள்ளதாக 2007. 04. 10ம் திகதியிடப்பட்ட கல்வி அமைச்சின் செயலாளரினால் கடிதம் அனுப்பி வைக்கப்பட்டுள்ளது. இதனை முன்னாள் கல்வி அமைச்சர் கௌரவ சுசில் பிரேம ஜயந்த அவர்களும் உறுதிசெய்த பின்னும்; எமக்கு எழுத்துமூல உறுதி வழங்கப்பட்ட இசுறு பாடசாலைத் திட்டம் பெரும்பான்மையின பாடசாலை ஒன்றுக்கு வழங்கப்பட்டி ருப்பதாக உத்தியோகப்பற்றற்ற முறையில் நாம் அறிகிறோம். (இது தொடர்பான ஆவணங்கள் இத்தோடு இணைக்கப்பட்டுள்ளன.) இதனை தூய உள்ளத்தோடு சிந்திக்கும் எவரும் இது ஒரு தெளிவான அநீதம் என்பதை ஏற்றுக் கொள்வார்.
மொழி ரீதியாகவும் எமது மக்கள் பல் வேறு சிரமங்களை, பாதிப்புக்களை சந்தித்து வருகின்றனர். இத்தொகுதியில் அரச கருமங்கள் அனைத்தையும் சிங்கள மொழியில் நிறைவேற்றவே திணிக்கப்பட்டுள்ளோம். ஆனால், எமது மக்கள் சிங்கள மொழியில் போதிய தேர்ச்சி பெற்றவர்களுமல்ல அதற்கான வாய்ப்புக்களுமில்லை. இதனால் எமது கல்வி வலயப் பணிமனையோடு, பிரதேச செயலகங்களோடு, மாவட்ட செயலகத்தோடு தொடர்பு கொண்டு தமது கருமங்களை நிறைவேற்றிக் கொள்வதில் பெரும் தடைகளை சந்திப்பதோடு, அரசு வழங்குகின்ற சலுகைகள், உரிமைகள் என்பவற்றைக்கூட தேடிப் பெற்றுக் கொள்ள முடியாது அல்லலுறுகின்றனர்.
வட மாகாண முஸ்லிம்கள் புலம் பெயர்க்கப்பட்டதன் விளைவாக காணி நிலங்கள் துண்டாடப்பட்டன. இடம் பெயர்க்கப்பட்ட வட மாகாண மக்களை குடியமர்த்துவதற்காக தெங்கு உற்பத்தி நிலங்கள் துண்டாடப்படவேண்டிய நிலை ஏற்பட்டது. இது பொருளாதார பின்னடைவை ஏற்படுத்தியுள்ளது. எமது பிரதேசத்தில் காணப்பட்ட காட்டு வளங்களும் நெல் விவசாய பூமியும் திட்டமிடப்படாத இறால் பண்ணை செயற்பாட்டினால் பாதிப்படைந்தன.
இவ்வாறு எமது வளங்கள் சூறையாடப்படுகின்றபோது சிறுபான்மை சமூகம் என்ற பெயர் தாங்கியதன் விளைவாக கையாலாகாதவர்களாக மௌனமாக இருந்து விடுகிறோம். இதற்கான திட்டங்களை வகுப்பதிலோ வகுத்த போதிலும் அதனை நடைமுறைப்படுத்துவதிலோ எவரும் அக்கறையற்றவர்களாகவே உள்ளனர்.
இந்த நாட்டை நாங்கள் நேசிக்கிறோம்; எமது மூதாதையர்கள் நேசித்து பங்களிப்புச் செய்தார்கள். வரலாற்று நெடுகிலும் இந்நாட்டின் முன்னேற்றத்திற்கு அரசர்களோடும், அரசுகளோடும் இணைந்து பங்காற்றியுள்ளனர். நிச்சயமாக இந்த நாட்டின் நேசர்களாகத்தான் எனது சமூகம் இருக்குமே தவிர துரோகிகளாக இருக்க மாட்டாது என்பது நிச்சயம். இந்த நாட்டில் சிறுபான்மையாக வாழும் எங்களுக்கும் இலங்கையர் என்ற அம்சம் செயல் வடிவத்திலும் யாப்பிலும் உறுதி செய்யப்பட வேண்டும்.
எமது பிரச்சினைகள், தேவைகள், அபிலாஷைகள் என்பன இதய சுத்தியோடு ஆய்வு செய்யப்பட்டு அவற்றிற்கான தீர்வுகள் இனங்காணப்பட்டு அவை நாட்டின் சட்ட யாப்பிற்கூடாக உறுதி செய்யப்பட வேண்டும் என்பதுதான் எனது பணிவான வேண்டுகோளாகும்.
முன்மொழிவுகள்
1. வட மாகாணத்தில் இடம்பெயர்க்கப்பட்ட முஸ்லிம் மக்களை துரிதமாக குடியமர்த்த ஏற்பாடு செய்தல். ஏனெனில், அது அவர்களது அடிப்படை உரிமையும் மார்க்க உரிமையுமாகும்.
2. வட மாகாண முஸ்லிம்கள் இங்கு வாழும் நிலை தொடருமெனில் அவர்களது கல்வி, சுகாதார, சமூக மேம்பாட்டு விட யங்களுக்கான வளங்கள், நிர்வாக விவகாரங்கள் அனைத்தும் வட மாகாணத்திற் கூடாகவே மேற்கொள்ளப்பட வேண்டும்.
3. வட மாகாண முஸ்லிம்களை ஒன்றில் அங்கு குடியமர்த்த ஒழுங்குகள் மேற் கொள்ள வேண்டும். அல்லது புத்தளம் மாவட்டத்தின் வாக்காளர் இடாப்பில் அவர்களது பெயர்கள் பதிவு செய்யப்பட வேண்டும். அதேவேளை அரசியல் உள் நோக்கம் கொண்ட இரட்டைப் பதிவுகள் அவசரமாக ஆய்வு செய்து தவிர்க்கப்பட வேண்டும்.
4. இடம்பெயர்க்கப்பட்ட மக்களுக்கு வடமேல் மாகாணத்தினால் வழங்கப்பட்ட தொழில் வாய்ப்புக்குரிய ஒதுக்கீட்டை பிரதியீடு செய்வதற்காக அவர்களுக்கு வழங்கப்பட்ட தொழிலினை வடமாகாண நிர்வாக எல்லைக்குள் வழங்குவதோடு அவ்விடைவெளிகளை எமது பிரதேச மக்கள் மூலம் நிரப்ப வேண்டும்.
5. எமது கல்வி மீள் எழுச்சியை கருத்திற் கொண்டு தனியான தமிழ்மொழி மூல நிலத்தொடர்பற்ற கல்வி வலயம் உருவாக்கப்படல் வேண்டும். (முன்னுதாரணமாக ஏராவூர் கல்வி வலயம்)
6. தொகுதி கல்வி வளர்ச்சியையும் எமது பிரதேச கல்வி நிலையையும் ஆய்வு செய்து உயர் கல்விக்கான கணிப்பீட்டுக் கொள்கை (z புள்ளி)யில் மாற்றம் கொண்டுவரப்படுவதோடு சிங்கள மொழி மூலப் பாடசாலைக்கு நிகரான பௌதீக, மனித வள அபிவிருத்திகள் மேற்கொள்ளப்பட வேண்டும்.
7. சம அபிவிருத்தி (வடக்கின் வசந்தம்)
யுத்தத்தினால் இடம்பெயர்க்கப்பட்ட வடமாகாண முஸ்லிம் மக்களினதும் புத்தளம் மாவட்ட முஸ்லிம்களதும் கல்வி, கலாசாரம், பண்பாடு, பொருளாதாரம், சுகாதாரம், தொழில் வாய்ப்பு என்பன பெரிதும் பாதிப்படைந்தன. எனவே, வடமாகாண அபிவிருத்தி நடவடிக்கைகளுக்கு முக்கியத்துவம் கொடுக்கப்படுகின்ற அதே அளவு முக்கியத்தவம் புத்தளம் மாவட்ட அபிவிருத்தி நடவடிக்கைகளுக்கும் வழங்கப்பட வேண்டும்.
8. இந்த பிரதேசம் ஒரு விஷேடமான பிரத்தியேகமான பிரதேசமாக (Aspecial Case) கருதப்பட்டு பணிகள் மேற்கொள்ளப்பட வேண்டும் என பிரதேச மக்கள் சார்பாக வேண்டுகிறோம்.
9. புத்தளம் பிரதேசத்துக்கு ஏற்பட்டி ருக்கும் இந்தப் பின்னடைவு தொடர்பாக குறிப்பாக தமிழ் மொழி மூல கல்வியில் ஏற்பட்டிருக்கும் பின்னடைவையும் கல்வியில் பின்தள்ளப்படுவதற்கு பங்களித்துள்ள காரணிகளையும்
ஆராய்வதற்கு ஒரு அரச உத்தரவாதமுள்ள ஆணைக்குழு அமைக்கப்பட வேண்டும் என்று கோருகிறோம்.
இறுதியாக இடம்பெயர்ந்தோருக்கென அவர்களுக்கு மட்டுமென (IDP only Mandate) வேலை செய்ய வந்த சர்வதேச நிறுவனங்கள் இடம்பெயர்ந்த மக்களுக்கும் உள்ளூர் மக்களுக்கும் நல்லிணக்கத்தையும் சக வாழ்வையும் ஏற்படுத்துவதற்கு பதிலாக இரு சமூகங்களுக்கும் இடையில் விரிசல்களையும் பூசல்களையும் தூண்டும் சதிகளில் ஈடுபட்டன. ஒரு சில ஐ.நா நிறுவனங்களும் இப்படியான செயற்பாடுகளில் ஈடுபட்டமை துரதிஷ்ட வசமானது (UNHCR- UNICEF)
10. உள்நாட்டு, சர்வதேச அரச சார்பற்ற நிறுவனங்கள் தமது செயற்பாடுகளை; இடம்பெயர்ந்தோர்ன உள்ளூர் என்ற வேறு பாடின்றி வறுமைக்கோட்டை அடிப்படையாக நிர்ணயித்து சகல மக்களினதும் மேம்பாட்டிற்காவும் பணியாற்ற வேண்டும்.
கற்ற இந்த பாடங்கள் ஊடாக நல்லிணக்கம் மற்றும் சகவாழ்வையும் எமது சந்ததியினருக்கு சுமுகமான பயனுறுதிமிக்க எதிர்காலத்தை உறுதிப்படுத்துவதாயின் மேலே நான் குறிப்பிட்ட விடயங்கள் கவனத்தில் கொள்ளப்பட்டு அவை இதய சுத்தியுடன் அணுகி ஆராயப்பட வேண்டும் என கருதுகிறேன்.
புத்தளம் பிரதேச மக்களின் அடிப்படையான அபிலாசைகள் புறக்கனிக்கப்பட்டு அவை தொடர்பான மக்களின் குரல் நசுக்கப்பட்டு எமது மக்கள் அரசியல் பொருளாதார சமூக ரீதியாக விரக்தியடைந்த ஒரு நிலையில் நம்பிக்கையீனம் அவர்களை கவ்விப்பிடித்திருக்கும் ஒரு துரதிஷ்ட நிலையில் தாங்கள் எமது குறைபாடுகளை கேட்டறியவந்ததை ஒரு பாக்கியமாகக் கருதுகிறோம். அதற்காக உங்களுக்கு எமது மனமார்ந்த நன்றிகளை அறியத்தருகிறோம்.
நன்றி;புத்தளம் ஒன்லைன்
Related posts :
0 comments for this post
Leave a reply
2008 - 2009 SimplexDesign. Content in my blog is licensed under a Creative Commons License.
- SimplexPro template designed by Simplex Design.
- Premium Wordpress Themes | Website Templates | Blogger Template .